المساعد الشخصي الرقمي

مشاهدة النسخة كاملة : مجنونة


إيمان معاذ
03-12-2012, 08:21 PM
مجــنونة
**********
عصفورة .. روحا الطيران
مبهورة .. بكون الرحمن
وبتعشق خلقه .. وحكاويهم
وبترفض قهر الإنسان
وان كان فرعون السّجان
ومسلط حُرّاسه .. عليهم
ف ودانه بتنشد غناويهم
وتقول الحق اللى كاويهم
***
مجنونة .. وقالتها عينيهم
ولا مرة جريئ فكر فيهم
بلسانه يفسر ويقولها

علشان أحوالهم .. أحوالها
وعشان الدنيا ف موالها ..
أبسط بكتير
من جمع وطرح .. ومعايير
من أصل وفصل ومحازيير
لف .. ودوران

الدنيا .. فى عيونها ببان
كلها مفتوحه ومسموحه ..
لدخول إنسان
مايكونش جبان
يهوى الطيران .. فوق البركان
***
لا النار .. بتسخَّن نِسمتها
ولا حتى طوفان بيهددها
الدنيا مكانها .. وسعادتها ..
لازم تتصان

مجنونة .. طبعا مجنونة
مفتونة .. بعِشق الحُرية
وبحق الروح البشرية
وبكل معانى الإحساس

تصرخ .. وتلم الحراس
وتدق جميع الأجراس
وبسن قلمها المتعاص ..
بدموع .. وأنين المساكين
تسأل حُراسها .. أنا مين ؟؟
أنا عاقلة .. وانتوا المجانين ؟؟
مجنونة .. وانتوا العاقلين ؟؟
ماتقولوا يا عالم .. أنا مين ؟؟

مجنونة .. وستين مجنونة
فاكره الأحلام المسكونة ..
فى ضمير أيامها .. بتتحقق
وكمان بتسدق .. أوهامها
وبترسم خِطة .. لأيامها
وكأن العالم قُدامها ..
لعبة أرقام
بإيديها تحدد .. وتقرر ..
مين الكسبان
ولا مرة بتظبط .. حساباتها

مجنونة و شايفه بأبعادها
أبعد من رؤية أسيادها
أبعد من كل المسافات

وعشان محسوبة الحسابات
هتعيش مجنونة .. ومسجونة
لو حتى الحراس أموات
لو حتى الحراس أموات
***

صباح الورد
03-13-2012, 09:06 AM
السلام عليكم
أختي الكريمة ايمان
كلمات رائعة تروي عن زمن أصبح فيه الطغيان
هو السائد بين البشر
تقبلي مروري
تقديري
دمتِ بخير