المساعد الشخصي الرقمي

مشاهدة النسخة كاملة : آل عادى آل...


صابرة
12-17-2015, 12:15 PM
آه عادى
لاسباب خاصه اضطرتنى الظروف أن أتعامل بمفردى مع اولادى قبل الذهاب إلى المدرسه.
شعرت للحظة ولأول مره فى حياتى انى مش عارف اعمل حاجه وفى حيص بيص.
.
اصحى الأولاد من النوم ( وحجم المعاناه)...ولا.. أحضر فطور ..ولا...أصب اللبن....ولا أحضر ساندوتشات المدرسه ..ولا... أساعد فى ترتيب الشنطه اللى نسيو يعملوها باليل....ولا تسريح الشعر ....ولا....ترتيب السرير...ولا...التتميم على الجاكت والأدوات ...ولا..ولا...ولا
كل ده فى 45 دقيقه...ايه كل الضغط البدنى والنفسى والعصبى اللى مريت به ده علشان الأولاد يخلصوا وينزلوا قبل موعد الجرس وبدء الدراسه .
يا نهار ابيض كل ده بيحصل الصبح فى الفتره اللى انا بشرب فيها الشاى وبجهز نفسى للخروج للشغل.
ده يا جماعه فيه حرب عالميه بتحصل فى البيت كل يوم وانا مش حاسس.
حرب عالميه بجد ...شربات وهدوم طايره. .. غرفه نوم الأولاد والتى وجدتها قد اصبها الدمار الشامل بعد ما مشيو. .. أشلاء ورق على الأرض والمكاتب ......آثار عدوان نووى على المطبخ. ....معظم اركان البيت قد أصابها زلزال 120 ريختر....ادى هذا الزلزال إلى وجود فيضان فى الحمام......ده غير فقدان لا شعورى للأعصاب وزعيق وصوت عالى ... أدى إلى انهيار تام بالجهاز العصبى و فقدان النطق والم بالمفاصل. .. و إجهاد بدنى وتشنج عضلى ...و...و..
وفجأه نزل الولاد بالسلامه و انتهت الحرب ووجدتنى اجلس على الكنبة فى المنطقه الوحيده التى لم يصبها الدمار وهى الصالون الذى نجحت بتوفيق من الله وحده أن احميه واحافظ عليه من العدو .
ووجدتنى فى حاله انهيار تام وذهول وفى حاله من التعب والإجهاد الفظيع وفى حاجه ملحة الى جلسات علاج نفسى طويله.
ياالهى كيف اسيطر على كل هذه الفوضى ....ده انا محتاج اكتر من شهرين علشان اسيطر على الموقف ولازاله آثار هذا العدوان الغاشم ....أحد أحد ....أحد أحد.
و اطفات الانوار واغمضت عينى لحظات ومن التعب رحت اغط فى نوم عميق.
وفجأ افقت على صوت زوجتى تقول لى مالك فيه ايه ...شكلك تعبان جدا لى كده ...فيه ايه طمنى ..ايه اللى حصل.... ايه...حد حصل له حاجه ....الأولاد كويسين....صحتك كويسه.....ليه تعبان كده...ليه...ليه...ليه....
نظرت اليها وقد هدأت قليلا ونظرت فى الساعه وجدت أنه قد مرت فقط 15 دقيقه من حاله الغيبوبه التى دخلت فيها وقلت لها وقد استعدت بعض قدرتى على الكلام والوقوف ...تعالى وانا اوريك اللى حصل فى البيت ....
قالت باستغراب ودهشه ايه اللى حصل انا مريت على البيت كله قبل ما ادرك انك نايم فى الصالون وكل شئ عادى.
قلت لها متعجبا وقد ايقظتنى كلماتها عادى.. ايه.. عادى ..تعالى وانا اوريكى...آل عادى آل.
أخدتها ومريت على كل مواقع الدمار ....
وكانت المفاجاه...مش ممكن ايه اللى حصل...البنك الدولى معقوله اتحرك بسرعه وأعاد إعمار البلاد....ولا البيت فيه عفاريت ....ولا انا بهلوس ....ولا انا بحلم.....كل شئ مترتب ونظيف ومنظم.......
وقلت منفعلا والله البيت كان يضرب يقلب ...انا بتكلم بجد ...انا مش بكدب أو بتخيل ....انا مش بهلوس.
وبكل هدوء ايوه انت كلامك صحيح .....عادى ...ده شئ عادى بعد الأولاد ما بيمشوا....وربع ساعه وكل شئ بيكون تمام ....ده عادى!...بس قولى بقى مالك تعبان ليه كده ...حصل ايه....قول..... خضتنى عليك اتكلم......
ووجدتنى وقد فقدت الكلام مره اخرى.....و مش قادر اقول إلا عادى!...عادى!...ده كان كابوس مزعج شويه.....
قلت لك متتقلش فى العشا وتنام وانت مش بتسمع الكلام......قوم اغسل وشك وأستعد لشغلك وصلى ركعتين على ما اجهز لك الشاى....انت الان بقيت احسن؟
قلت ..آه....عادى...عادى....بس المهم الشاى.
وقلت فى نفسى ده كده الشغل بقى رفاهية... يلا يا واد خد شنطتك وعلطول على العمل بدون نقاش.
آل عادى آل...
وسألت نفسى ...أمال باقى اليوم لما بيرجعوا قبل ما ارجع من الشغل بيبقى ازاى.
آل عادى آل...
تحيه صادقه وخالصه لكل ام تعمل فى قوات حفظ الأمن و السلام البيتى.
وآل عادى آل ...عادى!

دمتم بعافية

:faldbl_thumb: