|
وَإِنْ تَعُدُّوا نِعْمَةَ اللَّهِ لَا تُحْصُوهَا
ساعات بيكون عندك نعمة معينة .. نعمة بجد كتير غيرك بيتمناها .. بس يمكن لإنها دايماً معاك .. واتعودت إنها موجودة " هتروح فين يعني " .. بتبدأ تنسى قيمتها ، وتتجاهلها ، وتعيش حياتك وإنت مش حاطط في بالك إن النعمة دي ممكن في لحظة تروح منك .. وترجع تندم 😖 النعمة دي ممكن تكون ؛ 🌸 زوجة كويسة .. فيها صفات كتير حلوة ، وطبعاً فيها عيوب .. بس مميزاتها كتيرة .. ولإنها دايماً معاك فبدأت تشوف إن ده الطبيعي وإنها كدة كدة موجودة .. فمبقيتش تاخد بالك منها ولا تحس بقيمتها .. بس في يوم ما بسبب إهمالك ليها .. ممكن متلاقيهاش .. تطلق ، تموت ، أو حتى تبقى عايشة معاك جسد بس لكن روحها وقلبها ماتت جواهم كل حاجة حلوة ناحيتك 💔 ممكن تبقى 🌸 أم وأب بسيطين .. دايماً بيحاولوا يخلوك مبسوط على أد ما بيقدوا .. لكن يمكن علمهم قليل أو مش فاهمينك أوي .. فبتلاقيك علطول بتتذمر عليهم وتتخانق وممكن تزعقلهم !! رغم إنهم بيحبوك .. ونفسهم فعلاً يفرحوك .. بس هو ده بقى اللي بيعرفوا يعملوه واللي شايفينه صح .. وإنت مش عاجبك 😥 الناس دي لما تختفي من حياتك هتبدأ تحس بقيمتهم .. لما تلاقي البيت فاضي عليك هتعرف إن كان ليهم دور كبير .. بس إنت سيبت كل المميزات ومسكت في إنهم مش فاهمينك وبقيت شايف إن وجودهم مش فارق ! النعمة ممكن كمان تكون على شكل 🌸 أخت أو صديقة .. دايماً بتقف جنبي .. وعلشان هي علطول معايا فبقى ده الطبيعي .. ومابقيتش باخد بالي أصلاً إنها حاجة حلوة في حياتي وليها دور كبير !! ممكن تكون 🌸 أطفال أشقياء بيتنططوا حواليا في كل مكان .. وأنا بزهق من أصواتهم ولعبهم فدايماً بزعقلهم وأضربهم .. مع إن دي نعمة .. نعمة ناس كتير شقتها كلها هدوء وبتتمنى شوية من الضوضاء دي .. ممكن تكون 🌸 جسم سليم مافيهوش أمراض .. ولإني متعود إني علطول كويس .. مش بحس بالنعمة دي ولا بشكر ربنا عليها ولا بحافظ عليها .. لكن وقت ما تروح .. هعرف ساعتها إني أد إيه كنت غبي لما مقدرتش قيمتها واعتبرت إن ده الطبيعي ! وممكن وممكن وممكن .. ! ✍ النعم اللي ربنا رزقنا بيها حقيقي كتيييرة جداً .. كلنا بلا استثناء عندنا من النعم دي ☺☺ 💫 " وَإِنْ تَعُدُّوا نِعْمَةَ اللَّهِ لَا تُحْصُوهَا " وفي وسط النعم دي .. عندك حل من الاتنين .. 🍃 يا إما تقعد مع نفسك تاني وتفكر في كُل النعم اللي عندك وتعرف قيمتها بجد وتقرر إنك دايماً تشكر ربنا عليها وترضى بيها وتحاول تحافظ عليها لإنك مش مستنى ضياعها والندم عليها علشان تفهم .. وساعتها هتلاقي ربنا بيقولك " لَئِنْ شَكَرْتُمْ لَأَزِيدَنَّكُمْ " 🍂 يا إما هتكمل زي ما إنت وتبص للي في إيد غيرك وتتجاهل الكنوز اللي عندك .. وساعتها يبقى لازم يحصل فيك حاجة تخليك تندم وتعلمك الدرس كويس .. بس بعد ما تكون خسرت حاجة كبيرة 🌂 📩 والقرار ليك في الآخر .. حافظ عليهم .. حس بقيمتهم .. اشكر ربك وارضى .. حقيقي هتندم جامد لو ضيعتهم .. وساعتها الندم مش هيرجع اللي راح .. فخد بالك من دلوقتي أحسن ⏳ ( بتصرف ) :12801804532: |
| جميع الأوقات بتوقيت GMT +3. الساعة الآن 07:12 PM. |
Powered by vBulletin® Version 3.8.12 by vBS
Copyright ©2000 - 2024, Jelsoft Enterprises Ltd.
جميع المواضيع والمشاركات المطروحة تعبر عن وجهة نظر كاتبها ولا تعبر بالضرورة عن رأي إدارة الموقع