أولادك إستثمار العمر كله

أولادك , العمر , إستثمار

و أكبر خدمة ممكن تقدميها لأولادك الصغيرين إنك تُحفِّظيهم أذكار الصباح والمساء وأذكار اليوم والليله ..
الطفل من أول سن أربع سنوات عنده القدرة يحفظ ويفهم كل حاجة لكن عِنْد الأطفال ورغبتهم فى اللعب طول الوقت بتبقى فالغالب هى العائق إنك تقعديه قدامك وتُحفِّظيه أو حتى تفهميه معنى الاذكار وأهميتها ..
الأطفال بتتعلم بالنظر والممارسة والتكرار ..
إبنك وانتى بتصحيه من النوم أول ما يقوم خليه يسمعك وانتِ جمبه عالسرير وبتقولى الحمدلله الذى أحيانا بعد أن أماتنا و إليه النشور ..
هتقومى تدخليه الحمام خليه يسمعك وانتِ بتقولى اللهم إنى أعوذ بك من الخبث والخبائث ..
على حوض الحمام وهو بيغسل وشه بصى فى المراية وقولى اللهم كما حسَّنت خلقتنا حسِّن لنا أخلاقنا ..
وانتِ خارجه من الحمام ..يسمعك بتقولى غفرانك
جبتى الفطار .. قبل الأكل قولى بسم الله ..
بيلبس لبس المدرسه مع القميص بقول بسم الله
مع البنطلون بقول بسم الله ..مع الجزمه والشراب بقول بسم الله ..
وهو خارج من البيت على باب الشقة يسمعك بتقولى بسم الله توكلنا على الله ولا حول ولاقوة الا بالله اللهم إني أعوذ بك أن أضِل أو أُضَل أو أذِل أو أُذَل أو أظلِم أو أُظلَم أو أجهل أو يُجهل عليَ
وانتِ واقفة معاه مستنية باص المدرسة بتقولى أصبحنا و أصبح الملك لله والحمدلله ولا إله إلا الله محمد رسول الله
وهو بيركب بتسلمى عليه وبتقوليله استودعتك الله ..
لما يرجع البيت أول ما يدخل يقول السلام عليكم ورحمة الله وبركاته
لما يجى ينام يسمعك بتقولى باسمك ربى بك وضعت جنبى وبِك أرفعه فإن أمسكت نفسى فارحمها وإن أرسلتها فاحفظها بما تحفظ به عبادك الصالحين ..
إبنك بعد أول يومين انتِ مُنتظِمة بتقولى قصاده كده بصوت عالى من غير ما تطلبى منه انه يكرر أو إنه يقول زيك هتلاقيه جاى بيسأل هو انتى بتقولى إيه .. وبتعمل كده ليه ..!!
ساعتها بس تفهميه أنا بقول الكلام ال كان بيقوله النبى صلى الله عليه وسلم عشان ربنا يحبنى ويحفظنى ويدينى حسنات ويدخلنى الجنة ..
هيقلك طب أنا عاوز اقول زيك ..
تكرار ابنك وراكى الأذكار يوميا لمدة شهر واحد كفيلة إن الأمر يبقى عنده عادة أوتوماتيك بيعملها ويقولها سواء إنتِ فكرتيه أو لا ..
انتِ مش بس هتعلميه يُحصّن نفسه بالله انتى ك أم هتاخدى أجر كل مرة هيذكر فيها ربنا طول حياته
أولادك إستثمار العمر كله .. جاهدى فيهم ..

المصدر: ملتقى شذرات